الثلاثاء، 6 مارس 2018

الأوراق الأساسية للدراسة و توثيق الأوراق من السفارة الألمانية في مصر


هتكلم بالتفصيل عن الورق المطلوب لفيزا الدراسة و ازاى توثقه
= المفروض اوثق ايه للدراسة :
دى بقا على حسب انت هتقدم على ايه
- لو انت هتقدم تحضيرية ف انت كدة المفروض هتوثق بيان درجات الثانوية
- لو انت هتقدم بكالوريوس ف انت كدة هتوثق " ثانوية + بيان درجات/تقديرات مواد الجامعة للسنة او السنين اللى درستها هنا في مصر "
- لو انت هتقدم ماستر ف انت كدة هتوثق "ثانوية + بيان درجات/تقديرات مواد الجامعة + شهادة التخرج"
- لو انت هتقدم دكتوراة ف انت كدة هتوثق " ثانوية + بيان درجات/تقديرات مواد الجامعة + شهادة التخرج + بيان درجات/تقديرات مواد الماستر + شهادة الماستر "
-----------
وأيضا يفضل ..
- ورقة ال granding system
و دى ورقة بيبقا فيها نظام التقديرات فى الجامعة اللى درست فيها لان معظم الجامعات بتطلبها خصوصا لو ماستر و الجامعة عايزة تحسب مجموعك .. و بيان التقديرات او المواد مفيش فيه توضيح الدرجات او التقديرات .. مثلا المقبول من 50 ل 65 و الجيد من 65 ل 75 و الخ ..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
طب انا خلاص عرفت ايه الشهادات المطلوبة.. طب اوثقها ازاى
بص ي معلم خطوات التوثيق بتبقا من الجهة اللى صاردة منها الشهادة و بعدين خارجية وبعدين سفارة يعنى مفيش ورق هيتوثق سفارة غير لما يكون متوثق خارجية
= ازاى تستخرج الشهادات دى وتوثقهم خارجية
أولا - بيان درجات الثانوية العامة "مش الشهادة "
-اول حل انك هتروح الإدارة التعليمية اللى المدرسة بتاعتك تابعة ليها و بتقولهم عايز بيان درجات الثانوية بالعربى و متوجهه لألمانيا و تقريبا بتستلمها في نفس اليوم او بعدها بيومين تلاتة و دى بتختلف من مكان لمكان و بتدفع الفلوس و اعمل حسابك ان انت لازم تختمها ختم المحافظة قبل ما توثقها خارجية او ممكن تسألهم في الإدارة هتختمها منين عشان تختم خارجية
-تانى حل انك ممكن تروح الإدارة العامة للإمتحانات في السيدة زينب – القاهرة و تاخدها في نفس اليوم و بتبقا بالعربى برضه "و دى ممكن تروحها حتى لو انت من برا القاهرة " و بتروح ع الخارجية علطول و مبتحتجش تختمها من اى مكان قبل الخارجية
https://www.facebook.com/groups/311111149267612/permalink/537121786666546/
بعد ما تختار اى من الطريقين اللى فوق دول و توثق خارجية فبعد كدة لازم تروح تترجمها لألمانى من مترجم معتمد و بتروح ع السفارة علطول و مبترجعش للخارجية
" الثانوية بتطلع عربى ي جماعة و الترجمة الانجليزى او حتى الألماني من الإدارة التعليمية او العامة مبقتش بتتوثق في السفارة و بقت مرفوضة "
" مبتحتجش حاجة و انت بتطلع بيان درجات الثانوية غير اسمك و اسم المدرسة و البطاقة تقريبا بس مينفعش حد غيرك يطلعها من الادارة و فيه كذة واحد قال ينفع حد يطلعهالك بس يكون معاه البطاقة بتاعتك تقريبا
- طلاب الثانوية الأزهرية هيروحوا لقطاع المعاهد الأزهرية في شارع ثروت متفرع من شارع مصطفي النحاس في مدينة نصر بتحتاج رقم الجلوس معرفش ممكن حد يطلعهالك ولا لاء. بالنسبه الأختام ققولهم يختموهالك كل الأختام عشان هتوديها الخارجية و بعد كدة تترجم " تجربة زميلنا حسام بهاء "
ــــــــــــــــــــــــــــــــــــــــــــــــــــــــــــــــــــــــــــــــــ
ثانيا- شهادات الجامعة
- بتروح للشئون عندك او الكنترول بتطلع الشهادة اللى انت عايزها
مثلا لو انت معهد خاص فلازم تختمها ختم وزارة التعليم العالى قبل ما تروح للخارجية
اما لو جامعة خاصة فلازم تسأل فى الشئون ايه الاختام المفروض تختمها عشان توثقها خاريجة
ولو جامعة حكومية فلازم تختمها من سكرتير الجامعة ولازم تعرفهم وانت بتطلعها انك عايز تختم خارجية ف ايه المطلوب عشان تختم خارجية
لو الشهادة طلعتها بالعربى فلازم تروح لمترجم معتمد تترجمها المانى بعد ختم الخارجية
ولو هتطلعها انجليزى من مصدرها ف انت كدة مش هتحتاج تترجمها ل ألمانى بعد ختم الخارجية “عكس الثانوية خالص"
" اهم نقطة في موضوع التوثيق من الخارجية انك لازم تقولهم ان الورق رايح السفارة الألمانية و عايز الختم كامل – ركزوا ي جماعة – لازم الختم يبقا كامل و مكتب الخارجية فاهم يعنى ايه الختم كامل و لو قالوا مبنعملش الختم كامل فبتروح مكتب تانى بيعمل الكلام دة ي اما تختم من عنده و بعد كدة بتطلع على ديوان عام الوزارة في جاردن سيتى و تقولهم عايز الختم كامل و هما عارفين النظام "
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
= بيان درجات الثانوية بيقا من 15 – 30 ج
= توثيق الخارجية بيبقا ب 11 ج
= ترجمة الثانوية من مترجم معتمد فبتختلف ما بين مترجم و التانى فالأفضل تتصل بيهم و تعرف الأسعار
= سعر بيان درجات/شهادة الجامعة بيختلف من جامعة لجامعة
= مواعيد العمل في المصالح الحكومية معروفة ان هي من الأحد للخميس
من 8:30 صباحا ل 1:30 / 2:00 الظهر
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
كدة خلصت ي معلم توثيق شهادات الجامعة من الخارجية والثانوية و وثقتها خارجية و بعد كدة ترجمتها
= فالخطوة الجاية هي توثيق السفارة
هتروح السفارة في القاهرة معاك النسخ اللى انت عايز توثقها للدراسة
و التوثيق بيبقا من الأحد للخميس
من 8 ل 10 صباحا
و بتستلم رقم من الموظفة و بتروح تانى يوم عمل تستلم الأصل المتوثق بالرقم اللى انت استلمته
من 10:30 ل 11:30 صباحا
و ممكن تتأخر يومين / أسبوع براحتك مش لازم تانى يوم عمل
انت كدة وثقت الأصل ي معلم و عايز تراسل الجامعات فمينفعش تراسلهم بالنسخة الأصلية لان النسخة الأصلية بتبقا معاك و محدش بياخدها منك فبتضطر انك بتطلع نسخ طبق الأصل و لينا كطلبة 5 نسخ طبق الأصل ببلاش و أي نسخة زيادة بتدفع عليها فلوس
= طب ازاى توثق نسخ طبق الأصل
كل اللى عليك أنك هتروح تانى في اى يوم بعد ما تستلم الأصل
كإنك رايح توثق من جديد من الأحد للخميس
بس المرادى معاك
- النسخة الأصلية المتوثقة
- 5 صور للنسخة الأصلية و متصورين من أي مكتبة وش و ضهر و بتبقا ابيض و اسود و الصور تكون واضحة و مفيش اى دبوس يتفك .. ركزوا ي جدعان محدش يفك اى دبوس موجود فى الورق
- 5 ابلكيشن للجامعات بتدل ان الجامعة عايزة الورق دة
و هتلاقيهم في اللينكات دى
http://www.mediafire.com/file/qx74yl13djlsfxm/1.pdf
http://www.mediafire.com/file/v18rz7d71tv695a/2.pdf
http://www.mediafire.com/file/masddcmaf7ll377/3.pdf
http://www.mediafire.com/file/f3mz588dt2xcneo/4.pdf
http://www.mediafire.com/file/z7kc2t4yvjylcyq/5.pdf
" الجامعات دى مش لازم تقدم عليها - دى مجرد اثبات ان فيه جامعة بتطلب الورق دة عشان توثق ببلاش"
و هتاخد رقم و هترجع تستلمهم تانى يوم برضه
من الأحد للخميس
و بالصور المتوثقة " طبق الأصل " تقدر تراسل بيهم الجامعات
و كدة بقا معاك الأصل المتوثق و محتفظ بيه و معاك خمس نسخ متوثقين تقدر تراسل بيهم الجامعات
= ممكن اى حد يوثقلك ورقك فى السفارة مش لازم انت بس ع الاقل يبقا عارف هو هيوثق لمين
= لو انت من برا القاهرة من محافظة بعيدة فروحلهم بدرى من قبل 8 و قولهم ان انت من برا القاهرة و عايز تستلم الورق النهاردة لان المشوار صعب و بنسبة كبيرة هتستلمه فى وقت الاستلام بس اوقات بيرفضوا بحجة ان مفيش موظفين و ان عدد اللى بيوثق كتير " انت ونصيبك"
........................................
شهادات اللغة تقدر توثقها من السفارة
" الإيلتس و الألماني "
بس هتوثق الصورة مش الأصل و هتروح بالأصل و الصورة و ليك 5 صور توثقهم ببلاش و ممكن يقولوا هات اثبات ان الجامعة عايزة شهادة اللغة مثلا
= الشهادات مبتتوثقش خارجية
........................................
معلومات مهمة :
- التوثيق في السفارة الألمانية في القاهرة ببلاش للدراسة و بفلوس لأى حاجة تانية
- التوثيق في القنصلية الألمانية في الإسكندرية بفلوس لأى حد حتى لو دراسة
- التوثيق ببلاش للورق اللى الجامعة عايزاه مهما كانت الورق ايه .. لأى حد رايح سنة تحضيرية او بكالوريوس او ماستر " ليك النسخة الأصلية ببلاش + 5 نسخ طبق الاصل ببلاش و النسخة الزيادة بفلوس فيفضل تسألهم النسخة بكام "
- التوثيق ببلاش لاى حد مهما كان عمره لو طالع دراسة يعنى مش 26 والا الكلام دة
- التوثيق للدكتوراة بفلوس اة والله بفلوس لو مش مصدق اسأل السفارة
- لا يوجد فرق بين بيان الدرجات او بيان التقديرات لان كل جامعة فيها نظام غير جامعة اخرى والاتنين زى بعض
- لو انت خلصت بكالوريوس و عايز تقدم على بكالوريوس من تانى فهتوثق الثانوية و بيان درجات الجامعة و شهادة التخرج
- المحتوى العلمى و اثبات القيد او خطاب التوصية او شهادة الخبرة لو عايز توثقهم لازم تجيب اثبات من الجامعة ان هى عايزاه عشان توثقه ببلاش او ممكن يوثقوه من غير اثبات بالحب
- المحتوى العلمى عشان يتوثق من السفارة فلازم " اول صفحة يبقا مكتوب فيها اسمك و رقمك فى الكلية و اسم الجامعة و الكلية " و تبقا مختومة من الجامعة و الخارجية و تعتبر ورقة رسمية ..
- ورقة ال granding system مش لازم تتوثق سفارة والا خارجية .. كفاية ختم الجامعة و الكلية او المعهد
- اثبات الدراسة بالانجليزى .. هنا فيه كل المعلومات https://www.facebook.com/groups/311111149267612/permalink/466992803679445/
- لو الجامعة عايزة شهادة الميلاد او حتى اى ورقة فعادى ممكن توثقها من السفارة ببلاش وتجبلهم اثبات ان الجامعة عايزة كدة و توثقها و دة حقك
- الموتفيشن و السى فى مبيتوثقوش خارجية والا سفارة والله
- كل حاجة بتبقا مكتوبة على ضهر الورقة " يعنى لو وثقت 3 نسخ طبق الاصل فهيبقا مكتوب على ضهر الاصل ان انت وثقت 3 نسخ ولسا 2 "
- الله اعلم ايه اللى هيحصل لو دخلت السفارة و وثقت الورق ع اساس ان هو دراسة و بعدين دخلت السفارة ع فيزا تانية
- لو انت عايز توثق اى حاجة بفلوس فهتدفع بالمصرى مش باليورو و اسألهم التكلفة كام لان سعر اليورو بيتغير
- لو منحه تبع المانيا دكتوراة او ماستر او ايا كان فـممكن توثق اي شىء ببلاش بس هات ما يثبت انك حصلت على منحه دراسيه والجهه المانحه المانيا سواء دااد او اي نوع منح تانيه .
- لو انت مثلا معاك شهادة ثانوية/جامعة من دولة خارج مصر فلازم توثقها من السفارة الألمانية في البلد اللى انت اخدت منها الشهادة لان هنا في مصر هيرفضوا يوثقوا الورق
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
- لازم عشان توثق سفارة فلازم ختم الخارجية ميعديش عليه 6 شهور ..
او سنة لو هتوثق فى نفس السنة اللى انت ختمت فيها ختم الخارجية
مثلا لو ختمت فى يناير2017 من الخارجية ف تقدر توثق فى السفارة فى ديسمبر 2017
اما لو بدأت سنة جدبدة مثلا 2018
فمينفعش توثق سفارة
ولازم ترجع تجدد ختم الخارجية فقط حتى لو الورق كان مترجم
- توثيق السفارة صلاحيته مدى الحياة للاصل و النسخ طبق الاصل
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
قائمة بأسماء المترجمين المعتمدين من السفارة الألمانية في القاهرة " من عربى ل ألمانى / ألمانى ل عربى "
https://kairo.diplo.de/…/30…/anerkannte-uebersetzer-data.pdf
" كل سفارة ليها مترجمين معتمدين و لو عايز تعرف عناوين المترجمين فهتلاقى على موقع كل سفارة كل حاجة عنهم .. متروحش لأى حد وخلاص "
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
عنوان السفارة و مواعيد العمل
- فرع القاهرة
https://kairo.diplo.de/eg-ar/botschaft/-/1604804
- فرع الإسكندرية " له مواعيد معينة "
https://kairo.diplo.de/e…/botschaft/honorarkonsuln/-/1356276
بالتوفيق.

بقلم: 
Ahmed Adel Heikal

إرسال تعليق

Whatsapp Button works on Mobile Device only

Start typing and press Enter to search