الثلاثاء، 6 مارس 2018

ازاى أسافر ألمانيا للدراسة



جواب السؤال ده بيحتاج لايام نكتب فيها لكن هلخص النقط بشكل سريع جدا في ٤ مراحل ركزوا كويس فيهم.
------------------------------------------------------------------------------

المرحله الأولى:

١- فكرة السفر عموما

انك تبدأ تفكر في أنك محتاج في مرحلة ما تكمل طريقك برا و تبدأ من نقطة الصفر انك تشوف هتسافر فين و ازاي و الاهم ليه و هتعمل ايه و ازاي.
------------------------------------------------------------------------------
٢-الدافع

ده البنزين اللي بيشغلك طول رحلتك الصعبه جدا جدا لو الدافع بتاعك مش قوي جدا انسى انك تسافر لان الوقت طويل و الاجراءات كتير و التعقيدات اكتر و نفسيتك هتتعب فلو عندك دافع قوي جدا جدا ماشي غير كدا بلاش تبدأ.
------------------------------------------------------------------------------
٣-شبكة المعلومات

بما اننا بنتكلم عن المانيا فانت هتبدأ تكون شبكة معلومات و علاقات، تدخل جروبات الدراسه زي ده و تبص على كل البوستات بكومنتاتها و تفهم، تتابع الناس اللي مسافره بالفعل و تحس ان عندهم معلومه و تسألهم في الكومنتات و تضيف الناس اللي مسافره منهم الودودين اللي ماعندهمش ضغط كبير و تخليهم للطوارئ علشان مايزهقش منك لان حياته صعبه في الغربه فراعيه.
------------------------------------------------------------------------------
٤-لحظة الصفر

بعد ماخلاص اللي فات خد حقه معاك بتاع كام شهر و استوعبت كويس انك داخل على مطحنه و مخاطره يا تظبط يا لا و متحمل نتيجة قرارك و اللي هيترتب عليه تبدأ فورا تنفذ بدون تردد و اجراء بيسلم اجراء.
------------------------------------------------------------------------------

المرحلة التانية:

٥-تحديد الدراسة
شوف هتدرس ايه و تبدأ تدور على الجامعات اللي بتدرس المجال بتاعك و الطريقه في البوست المثبت، و تشوف مؤهلاتك ترشحك للقبول في الجامعه دي بعد ما تقارنها بمتطلباتهم او تراسل الجامعة لو عندك سؤال معين.
بعد كدا بتشوف التقديم امتى و ازاي.
٦-تجهيز الاوراق و التقديمفي بوست متطلبات التقديم للجامعات في البوست المثبت هتحضر الورق ده و تقدمه بالطريقه اللي الجامعه محدداها و دي ارخم مرحله لانك بتتعب في تجهيز الورق و بتتعب نفسيا بسبب الانتظار و كثرة الاجراءات، و بعد مابتقدم بتنتظر رد الجامعات عليك.
------------------------------------------------------------------------------

المرحله التالته (الفيزا):

٧-تحديد موعد مع السفارهده معاد مقابلة الفيزا و تقديم الاوراق و يستحسن تحدده قبل المعاد اللي انت عايزه بفتره لان المواعيد عليها ضغط و بتخلص بسرعه و تحجز معاد مقابله قبل المعاد اللي عايز تسافرله ب ٣ شهور
٨-الحساب البنكيكل الفتره اللي فاتت بتتختم معاك بقبول الجامعه و بتبدأ مرحلة الفيزا بانك تفتح الحساب البنكي المغلق في المانيا و ده موجود بالبوست المثبت و بعد مايتفتح بتحول الفلوس و تستنى يبعتولك كونفيرم خلال اسبوع ان تم وصول مبلغ كذا و اتعمله بلوك
٩- ابلكيشن السفارة ده ابلكيشن الفيزا و معاه الاقرار الامني بتنزلهم ظن موقع السفاره و تملاهم نسختين كل واحده و تمضيه
١٠- بتروح مقابلتك في اليوم المحدد معاك الأتيقبول الجامعه + الحساب البنكي + ورقة تأكيد وصول الفلوس لهم+شهادة لغة الدراسة سواء ايلتس او الماني+ ابلكيشن الفيزا+الاقرار الامني+شهاة الثانوية+شهادة البكالوريوس (ان وجد)+ صور شخصيه بمقاسات هتلاقيها على موقع السفاره.
------------------------------------------------------------------------------

المرحلة الرابعه:

باذن الله يجيلك القبول بتروح تعمل تأمين سفر ٦ شهور من اي شركة تأمين سياحي و ليكن الينز و توديه مع الباسبور في ايام تسليم الباسبورات و تنتظر يومين يدوك الباسبور عليه الفيزا.

بتطلع تصريح السفر من العسكر و تحجز طيران و تتوكل على الله و يبقى لينا بوست من المطار للجامعه و الحياه هناك
------------------------------------------------------------------------------
تنبيه : المعلومات الوارده هنا مكتوبه و تقرأ في دقائق و لكن تنفيذها قد يحتاج سنه و يحتمل فيها الفشل او النجاح و هذه الفتره هي اصعب فترة تمزق نفسي للمتقدم

بقلم : مروان احمد

إرسال تعليق

Whatsapp Button works on Mobile Device only

Start typing and press Enter to search